തൂവിരല്‍ തുമ്പുകൊണ്ടെഴുതുന്ന
നാലക്ഷരങ്ങളാം നമ്മുടെ ബാല്യകാലം
ഓര്‍മതന്‍ ചെറുമുറ്റത്തെത്തിയൊന്നാകുന്ന
ആദ്യാക്ഷരങ്ങളാം ബാല്യകാലം
സ്നേഹവും നന്മയും സംക്രമിച്ചൊഴുകുന്ന
വിദ്രുമക്കടലാണെന്‍ ബാല്യകാലം
കുഞ്ഞാറ്റക്കുരുവികള്‍ക്കൊപ്പം
നടന്നുകൊണ്ടൊരു കൊച്ചു കിന്നാരം
പറഞ്ഞ കാലം
തുമ്പിയെക്കൊണ്ടൊരു കല്ലെടുപ്പിച്ചീടാന്‍
തുമ്പപ്പൂവൊന്നു പറിച്ചീടുവാന്‍
പാടിപ്പറക്കുന്ന പക്ഷികളെപ്പോലെ
തേടിയലഞ്ഞു പറന്നു നമ്മള്‍
കല്ലായിപ്പുഴയിലെ നീരാട്ടിന്‍ തീരത്ത്
കണ്ണാരം പൊത്തിക്കളിച്ചു നമ്മള്‍
മണ്ണു കുഴച്ചിട്ട് കണ്ണന്‍ ചിരട്ടയില്‍
മണ്ണപ്പം ചുട്ടു കളിച്ചു നമ്മള്‍
അക്കരക്കാവിലെയുത്സവം കാണാനായ്
ആര്‍ത്തു തിമിര്‍ത്തന്നു പോയി നമ്മള്‍
കുഞ്ഞിക്കഥകളും കുഞ്ഞിക്കവിതയും
ചൊല്ലിപ്പറഞ്ഞു രസിച്ചു നമ്മള്‍
വീട്ടിന്‍ വളപ്പിലോരോലപ്പുര കെട്ടി
കഞ്ഞിവെച്ചന്നു കുടിച്ച നേരം
വെള്ളരിപ്രാവിന്റെ തൂവലു കൊണ്ടന്നു
ഇക്കിളി കൂട്ടിക്കളിച്ചു നമ്മള്‍
കടലാസു കൊണ്ടൊരു തോണിയുണ്ടാക്കിക്കൊണ്ടതില്‍
കൊച്ചുറുമ്പിനെക്കേറ്റി തുഴഞ്ഞു വിട്ടു
എന്നിട്ടും ചേണുറ്റ ചിത്രപതംഗമായ്
മിന്നിമറഞ്ഞുപോയ്
ബാല്യകാലം
മാതളപ്പൂ പോല്‍ വിടര്‍ന്നു ചിരിക്കുന്ന
ലാവണ്യമോലുന്ന ബാല്യകാലം
(മലയാളം ക്ലാസിലെ പ്രവര്‍ത്തനങ്ങളുടെ ഭാഗമായി രൂപം കൊണ്ട മികച്ച സൃഷ്ടികളിലൊന്ന്)
ഹരിത . എ .
ഏഴാം തരം,
ഗവ:ഹയര്‍ സെക്കന്‍റ്ററി സ്കൂള്‍, കൊട്ടപ്പുറം
No comments:
Post a Comment
താങ്കളുടെ അഭിപ്രായം ദയവായി രേഖപ്പെടുത്തുക..